Reprise vun den Aktivitéiten am Bildungsberäich: Froen an Äntwerten

Op dëser Säit fannt Dir déi heefegst Froen an Äntwerten zu der Reprise vun den Aktivitéiten am Bildungsberäich.

Allgemeng Froen

Wie kann e Congé aus familiäre Grënn (Congé pour raisons familiales) ufroen?

En Elterendeel, deen zu Lëtzebuerg sozialverséchert ass (dorënner och Netresidenten), kann am Kontext vun der Covid-19-Pandemie Congé aus familiäre Grënn ufroen, wann ee Kand oder méi Kanner zu enger vun de follgende Kategorië gehéiert respektiv gehéieren:

•    Kanner vum Demandeur, déi um oder nom 1. September 2015 gebuer sinn an ënnerhaltsberechtegt sinn;

•    Kanner ënner 13 Joer, déi an eng Schoul ginn, déi zou ass oder an där den Unterrecht wéinst Grënn, déi an direktem Zesummenhang mat der Gesondheetskris stinn, ausfält, oder déi wéinst de virgeschriwwene Virsiichtsmoossname vu kenger Schoul oder Struktur kënne betreit ginn. An dësem Fall muss en Attest vum Ministère fir Educatioun, Kanner a Jugend iwwer déi besteeënd Situatioun virgeluecht ginn;

•    Kanner, déi als ufälleg gëllen no de Recommandatiounen a medezinesche Krittären, déi de Conseil supérieur des maladies infectieuses – CSMI festgeluecht huet. Als vulnerabel fir de Covid-19 gëllen den Empfeelunge vum CSMI no Kanner, déi ënner Otemwee-Erkrankungen, Häerzkrankheeten oder engem Immundefekt leiden.

DʼEltere vu Kanner mat enger Behënnerung am Alter vun 13 bis 18 Joer (oder bis 25 Joer) kënnen de Congé aus familiäre Grënn an Usproch huelen, wa se eng zousätzlech Spezial-Allokatioun fir Kanner mat enger Behënnerung vun der Zukunftskeess (CAE) kréien.

E Formulaire mat allen néidegen Informatioune fannt Dir op guichet.lu: http://guichet.lu/cocrf

Wou kann ech Informatiounen iwwer de Coronavirus Covid-19 fannen?

Consultéiert dofir de Site www.covid19.lu. Dir kënnt och dʼHotline 247-65533 uruffen.

Wou kann ech nëtzlech Informatioune fannen?

Fir all Fro, déi dʼEducatioun am Allgemenge betrëfft, rufft wgl. op dʼNummer 8002-9090 un.

Vum Juni un ass dʼHelpline 8002 9090 an der Woch vun 9 bis 12 Auer a vun 13 bis 16 Auer ze erreechen. Um Weekend an op de Feierdeeg ass se net aktiv. Dir kënnt Är Froen och iwwer de Kontaktformulaire op www.schouldoheem.lu eraschécken.

Dir kënnt och den Internetsite vum Ministère fir Educatioun, Kanner a Jugend consultéieren.

Ausserdeem hutt Dir dʼMéiglechkeet, dʼAktualitéit op www.covid19.lu an an den nationale Medien ze suivéieren.

U wie kann ech mech riichten, wann ech Froen zum Thema Kanner a Jonker mat spezifesche Besoinen oder mat enger Behënnerung hunn?

D’Sozialaarbechter vum „Service de la scolarisation des élèves à besoins spécifiques“ (S-EBS) stinn Iech bei all Zort vu Froe mat Rot an Dot zur Säit.

Dir erreecht eis iwwert d’Helpline vum Ministère fir Educatioun, Kanner a Jugend ënnert der Nummer 8002 9090 oder per E-Mail: social.s-ebs@men.lu.

U wie kann ee sech riichten, wann een Hëllef oder psychologesch Betreiung brauch?

De CePAS (Centre psycho-social et d’accompagnement scolaires) offréiert de Schüler, den Elteren an den Enseignanten och am Kontext vun der Pandemie vum Covid-19 en oppent Ouer, eng Berodung an eng Begleedung:

- iwwer Telefon um 247-75910;

- a perséinleche Consultatiounen (gratis, nëmmen op Rendez-vous);

- iwwer Teleconsultatiounen op Ufro.

Mir si fir Iech do vu méindes bis freides, och an de Schoulvakanzen, vun 8:30 Auer bis 12 Auer a vun 13 bis 17 Auer.

Kontakt: Facebook a Messenger: @cepasluxembourg, E-Mail: info@cepas.public.lu, Internetsite: www.cepas.lu


Wéini ginn dʼAktivitéiten nees opgeholl?

D’Aktivitéiten an de Schoulen an an den Accueil-Strukture lafe nees progressiv un.

D’Reouverture gëtt begleet vu strikte Schutzmoossnamen, fir eng maximal Sécherheet vun de Kanner an de Jonken an och vum Personal ze assuréieren. Am Enseignement fondamental (Grondschoul) grad ewéi am Enseignement secondaire fänken d’Couren u mat engem Wiesselsystem, deen et erlaabt, d’Kontinuitéit vum Unterrecht a vum Léieren ze garantéieren a gläichzäiteg d’Zuel vun de Schüler an de Schoulgebaier ëm 50 % erofzesetzen.

D’Aktivitéite fänken no dësem Kalenner nees un:

20. Abrëll 2020


- Mesurë fir Schüler an enger Situatioun vun Deconnexioun oder Decrochage

- Reprise vun den ambulante Servicer vum Secteur vun der „Aide à l’enfance et à la famille“ (AEF), besonnesch vum „Office national de l’enfance“ (ONE)

- Punktuell Betreiung vu Schüler mat spezifesche Besoinen duerch d’Kompetenzzentren an der spezialiséierter Psychopedagogik a vun de sozio-therapeuteschen Zenteren, esouwäit d’Kontinuitéit vun enger Therapie, enger Reeducatioun oder enger Diagnos dovun ofhänkt.

4. Mee 2020


- Premièresklassen am Enseignement secondaire classique a général

- Ofschlossklassen an der Beruffsausbildung/Formation professionelle (CCP, DAP an DT)

11. Mee 2020


- D’Klasse vu 7e bis 2e am Enseignement secondaire classique a général

- Déi aner Klassen (Netofschlossklassen) an der Beruffsausbildung/Formation professionnelle

- Individuell Coursen am Museksunterrecht

25. Mee 2020


- D’Cyclen 1 bis 4 vum Enseignement fondamental (Grondschoul)

- Accueil-Strukturen an Dageselteren (Assistant-parentallen)

- Klassen an de Kompetenzzentre vun der spezialiséierter Psychopedagogik.

29. Juni 2020

- D’Gruppe vum Wiesselsystem A a B ginn nees zesummegeluecht zu enger Klass, an der Grondschoul an am Enseignement secondaire.

15. Juli 2020

- Vakanzaktivitéiten a Gruppe vu bis zu 50 Kanner, encadréiert vu maximal 10 Animateuren.

D’Direktioun vun der Santé evaluéiert d’Situatioun reegelméisseg nei an den Datum vun der Reprise vun de Coursë kann adaptéiert ginn, jee nodeem wéi dʼSituatioun sech entwéckelt.

16. Juli 2020


- Crèchen, Mini-Crèchë fir kleng Kanner, Maison-relaisen, Foyer-de-jouren an Dageseltere funktionéieren nees mat normalgrousse Gruppe vu Kanner an zu de gewinnten Auerzäiten.

Wou kann ech online pedagogescht Material an Iddie fir Aktivitéite mat de Kanner fannen?

Den Internetsite www.schouldoheem.lu bréngt Iech bei eng Hellewull vu pedagogeschem Material, dat sech un d’Elteren, un d’Schüler grad ewéi un d’Enseignanten aus der Grondschoul, aus dem Secondaire an aus ville Beräicher vun der Beruffsausbildung riicht.

Fir dës Offer ze komplettéieren, proposéiert d’Helpline vum Ministère um Tel. 8002 9090 eng schoulesch an eng psychologesch Betreiung.

De Beräich „Kannerdoheem“ proposéiert e sëllegen Aktivitéiten an och spilleresch an ënnerhalsam Iddie fir Kanner tëscht 1 a 4 Joer an tëscht 4 an 12 Joer, déi een doheem oder mat Frënn ka realiséieren. Fir ze iwwerleeën, fir kreativ ze sinn, fir un anerer ze denken, fir a Beweegung ze bleiwen, ouni d’Frënn vum Bastelen ze vergiessen!

Op www.aktivdoheem.lu fannt Dir Rotschléi, fir fit ze ginn oder fir fit ze bleiwen. D’Aktivitéiten decke véier Kategorien of: Eltere mat Kanner, Jugendlecher, Senioren a kleng Kannergruppen.

Wat maachen ech, wann den IAM-Kont vu mengem Kand nach net aktivéiert gouf?

Wann Äert Kand an der Grondschoul ass, da riicht Iech wgl. un deen Enseignant, deen Titulaire de classe ass. Wann Äert Kand am Secondaire ass, da kënnt Dir säin IAM-Kont selwer iwwer de Site iam.education.lu aktivéieren, andeems Dir déi do beschriwwe Prozedur anhaalt.

Bei technesche Problemer fëllt wgl. de Kontaktformulaire op dem Site www.schouldoheem.lu aus a gitt och dʼMatricule vun Ärem Kand un. De „Centre de gestion informatique de l’éducation“ (CGIE) këmmert sech dann drëm.

Weider Detailer

Spillplazen a Vakanzaktivitéiten

Däerfen d’Kanner dobaussen op d’Spillplaze goen?

D’Spillplazen dobausse sinn nees op, ouni eng Schutzmoossnam wéi eng Maskflicht oder eng Distanzreegel fir Kanner ënner 13 Joer.

Kënnen dëse Summer Vakanzaktivitéite sinn?

D’Vakanzaktivitéiten, déi tëschent dem 15. Juli an dem 15. September 2020 vun de Gemenge proposéiert ginn, zum Beispill Kolonien a Scoutscampen, kënne sinn. D’Aktivitéite ginn a Gruppe vu 50 Kanner organiséiert a vu maximal 10 Animateuren encadréiert. D’Aktivitéite sollen esou vill méi méiglech am Fräie sinn. Kontakter mat Leit vu bausse sollen op e Minimum reduzéiert ginn, do gëllen dann och nach déi üblech Reegelen.

Schüler mat spezifesche Besoinen

Wéi ass d’Reprise vun den Aktivitéiten an de Kompetenzzentre vun der spezialiséierter Psychopedagogik organiséiert?

Zanter dem 20. Abrëll assuréieren d’Kompetenzzentren an der spezialiséierter Psychopedagogik eng punktuell Betreiung vu Schüler mat spezifesche Besoinen, esouwäit d’Kontinuitéit vun enger Therapie, enger Reeducatioun oder enger Diagnos dovun ofhänkt.

Am Mee fänken déi spezialiséiert ambulant Interventioune vun de Kompetenzzentren an de Klasse vun de Schoulen a vun de Lycéeën nom Zäitplang vun der Reprise fir d’Schüler nees un: den 11. Mee fir d’Schüler aus dem Enseignement secondaire an de 25. Mee fir d’Schüler aus dem Enseignement fondamental (Grondschoul).

De 25. Mee 2020 fänken dʼKompetenzzentren nees mat all hiren Aktivitéiten un a maachen och nees hir Klassen op.

Sämtlech Schüler huelen an alle Woche mat Cours um Unterrecht an un de proposéierten Aktivitéiten deel. E Wiesselsystem mat Klassen, déi an zwee Gruppe gedeelt ginn, ass net néideg wéinst der klenger Zuel vu Schüler pro Klass.

Fir e maximale Schutz vun alle Schüler a vum Personal géint d’Verbreedung vum Covid-19-Virus ze garantéieren, ginn d’Schüler a klenge Gruppen, déi net wiesselen, betreit an d’Schutzmoossname ginn agehalen.

D’Schüler, déi an der Klass vun engem Kompetenzzenter sinn, kënnen net an enger Accueil-Struktur betreit ginn. Ma de Stonneplang vun den Zentre gëtt net verännert, d’Schüler ginn also déi ganzen Zäit vun den üblechen Ëffnungszäiten encadréiert. Wann néideg kënnen d’Elteren op de Congé aus familiäre Grënn (Congé pour raisons familiales) zeréckgräifen, fir sech ëm d’Kanner ze këmmeren, wann déi vum Kompetenzzenter kommen.

Den Transport vun de Schüler mat spezifesche Besoine vun hirem Doheem op d’Plaz vun der Scolarisatioun gëtt gemaach vum „Service de transport complémentaire dʼaccessibilité pour personnes à besoins spécifiques“ (CAPABS). Adaptatioune si virgesinn, dorënner zousätzlech Faarten, fir datt d’Distanzen tëscht de Persoune wärend dem Trajet am Bus kënnen agehale ginn.

D’Schüler vun de Kompetenzzentre kréien och weider z’iessen op der Plaz: entweeder eng personaliséiert Snacktut („Frupstut“) vum Service Restopolis oder eng Moolzecht, déi de spezifesche Besoine vun de Schüler ugepasst ass.

Déi spezifesch Ateliere vun de Kompetenzzentre fale bis dʼEnn vum Schouljoer aus.

DʼServicer vun der Diagnos a vun der Berodung oder Betreiung gi weider assuréiert, am Respekt vun de Virsiichtsmoossnamen a vun den allgemengen Hygiènesreegelen.

Wéi eng Moossname ginn ëmgesat, fir dʼGesondheet vun de Schüler a vum Personal an de Kompetenzzentren ze schützen?

Mat Bléck op dʼVilfalt vun de Plazen an op d’Besonneschheete vun de Schüler mat spezifesche Besoine ginn dʼSchutzmoossnamen ugepasst an ëmfaasse virun allem dës Punkten:

•    D’Personal muss, esou wäit dat méiglech ass, eng Distanz vun op d’mannst zwee Meter ënnerenee respektéieren. Wann dës Distanz net kann agehale ginn, dann ass d’Droe vun enger Mask, engem Bandana (Buff) oder engem Schal, deen Nues a Mond bedeckt, obligatoresch.

•    D’Schüler musse vum Personal dofir sensibiliséiert ginn, datt se besser hunn, ënnereneen eng Distanz vun zwee Meter anzehalen, och wa gewosst ass, datt dës Mesure net zu all Ament strikt kann agehale ginn.

•    D’Droe vun enger Mask ass fir Kanner ënner zwee Joer streng verbueden (Erstéckungsgefor). D’Consigne vum Droe vun enger Mask, engem Bandana (Buff) oder engem Schal gëllt net fir Kanner ënner sechs Joer. Onofhängeg vum Alter dierf eng Mask ni ugedoe ginn, wann d’Persoun net fäeg ass, se selwer auszedoen (z. B. Schüler mat Handicap), et sief, si wier permanent ënner direkter Opsiicht. Spezial-Consignë kënnen da gëllen, wann et eng spezifesch Virgab vun engem Dokter gëtt.

•    D’Gruppe méiglechst onverännert loossen, fir ze vermeiden, datt Schüler Kontakt zu Schüler hunn, déi net zu hirem Grupp gehéieren.

•    Reegelméisseg d‘Hänn wäschen.

•    Desinfektiounsmëttele stinn an all Klassen- a Betreiungssall zur Verfügung, awer esou dann d’Kanner net dru kommen.

•    Material oder Ekipementer esou wäit ewéi méiglech net deelen an drop oppassen, datt d’Schüler d’Masken net ënnereneen tauschen.

•    Am Transport fir an d’Schoul oder vun der Schoul fort d’Reegele vun der kierperlecher Distanz (Social Distancing), esou gutt et geet, anhalen.

Accueil-Strukturen

Wéi funktionéieren d’Crèchen an d’Mini-Crèchë fir kleng Kanner vum 16. Juli 2020 un?

Vum 16. Juli 2020 u funktionéieren d’Betreiungsstrukture fir kleng Kanner nees mat normalgrousse Gruppen.

Ganz konkreet kënnen d’Crèchen an d’Mini-Crèchë fir kleng Kanner (jee no erlaabter Capacitéit) ophuelen:

- bis zu 12 Kanner tëschent 0 an 2 Joer;
- bis zu 16 Kanner tëschent 2 a 4 Joer;
- bis zu 12 Kanner a gemëschte Gruppen (0 bis 4 Joer);
- bis zu 11 Kanner an de Mini-Crèchen.

D’Aktivitéite mussen esou organiséiert ginn, datt d’Kanner esou vill ewéi méiglech Zäit dobaussen am Fräie verbréngen.

D’Schutzmesuren, déi no de Recommandatioune vun der Direktioun vun der Santé ëmgesat goufen, bleiwe bestoen (kuckt hei drënner: Wéi eng Moossname ginn ëmgesat, fir d’Gesondheet vun de Kanner a vum Personal vun de Crèchen a vun de Mini-Crèchë fir kleng Kanner ze schützen?).

D’Erzéiungs- a Betreiungskontrakter, déi tëschent den Elteren an der Betreiungsstruktur virum Confinement ofgeschloss goufen an zanterhier suspendéiert sinn, ginn de 16. Juli 2020 reaktivéiert (kuckt: Wéi ginn d’Erzéiungs- a Betreiungskontrakter geréiert?).

Wéi funktionéieren d’Betreiungsstrukture fir scolariséiert Kanner vum 16. Juli 2020 un?

Vum 16. Juli 2020 u funktionéieren d’Betreiungsstrukturen nees zu den normalen Auerzäiten, déi de Gestionnaire festleet.

D’Gruppen däerfen net méi grouss wéi 50 Kanner sinn.

D’Aktivitéite mussen esou organiséiert ginn, datt d’Kanner esou vill ewéi méiglech Zäit dobaussen am Fräie verbréngen.

D’Schutzmesuren, déi no de Recommandatioune vun der Direktioun vun der Santé ëmgesat goufen, bleiwe bestoen

D’Erzéiungs- a Betreiungskontrakter, déi tëschent den Elteren an der Betreiungsstruktur virum Confinement ofgeschloss goufen an zanterhier suspendéiert sinn, ginn de 16. Juli 2020 reaktivéiert (kuckt: Wéi ginn d’Erzéiungs- a Betreiungskontrakter geréiert?).

D’gratis Betreiung vu Kanner, déi an d’Schoul ginn, hält den 19. Juli 2020 op. Vum 20. Juli 2020 u ginn d’Leeschtungen nees normal facturéiert.

Wéi funktionéieren d’Dageseltere vum 16. Juli 2020 un?

D’Dageselteren (Assistant-parentallen) betreien d’Kanner vun 0 bis 12 Joer, jee no erlaabter Capacitéit.

An enker Ofsprooch mat den Eltere respektéieren d’Dageselteren déi Schutzmoossnamen, déi dem Alter vun de Kanner ugepasst sinn (kuckt och an der FAQ „Wéi eng Moossname ginn ëmgesat, fir d’Gesondheet vun de Kanner a vum Personal vun de Crèchen an de Mini-Crèchë fir kleng Kanner ze schützen?“). Nieft den Hygiènesmesurë bedeit dat virun allem, d’Plaz vum Accueil no baussen ze schützen an Aktivitéiten dobaussen am Fräie virzezéien. Hei fannt Dir d’Consignë fir d’Dageselteren.

D’Erzéiungs- a Betreiungskontrakter, déi tëschent den Elteren an der Betreiungsstruktur virum Confinement ofgeschloss goufen an zanterhier suspendéiert sinn, ginn de 16. Juli 2020 reaktivéiert (kuckt: Wéi ginn d’Erzéiungs- a Betreiungskontrakter geréiert?).

Wéi ass dʼReprise bis de 15. Juli 2020 organiséiert an de Betreiungsstrukture fir scolariséiert Kanner?

DʼMaison-relaisen an dʼKannerfoyere schaffen nees vum 25. Mee 2020 un.

D’Kooperatioun vun den Elteren ass vun zentraler Bedeitung: Si sinn enk agebonnen an d’Ëmsetzung an an d’Anhale vun de Schutzmesuren. D’Educateure fir hiren Deel ginn de Kanner am Alldag mam gudde Beispill vir, andeems se sech adequat verhalen.

D’Gruppe ginn op maximal zéng Kanner reduzéiert, fir hinnen esou vill Plaz ewéi méiglech ze loossen. Dee selwechten Educateur këmmert sech ëmmer ëm dee selwechte Grupp, esou wäit dat méiglech ass.

D’Aktivitéite sinn esou dacks ewéi méiglech dobaussen am Fräien.

Schutzmesure géint dʼVerbreedung vum Coronavirus Covid-19 ginn och an de Betreiungsstrukturen ëmgesat, fir dʼKanner an dʼPersonal beschtméiglech ze schützen.

D’Plazen, d’Material an d’Spillsaache gi reegelméisseg grëndlech gebotzt. Material a Spillsaachen, déi net kënne gebotzt ginn, ginn net benotzt.

Giess gëtt am Openthaltsraum vum Grupp.

Wéi gëtt d’Reprise vun den Aktivitéiten an de Crèchen an an de Mini-Crèchë bis de 15. Juli organiséiert?

Fir d’Sécherheet vu jiddwerengem bei der Reprise vun den Aktivitéiten ze garantéieren, setzen d’Crèchë Schutzmoossnamen ëm, déi de Besoinen an de Fäegkeete vun de Kanner entspriechen. De grousse Prinzip vun deene Mesuren ass, datt esou mann ewéi méiglech Leit vu bausse Kontakt zu de Kanner hunn. Duerch dës Beschränkung kënne Schutzmesuren ewéi de Social Distancing oder de Verzicht op Kierperkontakt am Kannergrupp gelabbert ginn.

D’Kooperatioun vun den Elteren ass vun zentraler Bedeitung: Si sinn enk agebonnen an d’Ëmsetzung an an d’Anhale vun de Schutzmesuren. D’Educateure fir hiren Deel ginn de Kanner am Alldag mam gudde Beispill vir, andeems se sech adequat verhalen.

D’Gruppe ginn op maximal fënnef Kanner reduzéiert, fir hinnen esou vill Plaz ewéi méiglech ze loossen. Dee selwechten Educateur këmmert sech ëmmer ëm dee selwechte Grupp, esou wäit dat méiglech ass.

D’Aktivitéite sinn esou dacks ewéi méiglech dobaussen am Fräien.

D’Plazen, d’Material an d’Spillsaache gi reegelméisseg grëndlech gebotzt. Material a Spillsaachen, déi net kënne gebotzt ginn, ginn net benotzt.

Giess gëtt am Openthaltsraum vum Grupp.

Wéi eng Moossname ginn ëmgesat, fir dʼGesondheet vun de Kanner a vum Personal vun de Crèchen a vun de mini-Crèchë fir kleng Kanner ze schützen?

D’Schutzmoossname fir d’Personal

Ëmmer dann, wann Erwuessener keng tëschemënschlech Distanz vun zwee Meter kënne respektéieren, ass d’Droe vun enger Mask, engem Bandana (Buff) oder engem Schal, dee Mond an Nues bedeckt, obligatoresch.

Bei de Kanner kann d’Personal sech net stänneg d’Gesiicht bedecken, well d’Kanner de Gesiichtsausdrock musse kënne gesinn.

Déi kierperlech Kontakter mat de Puppelcher gi selbstverständlech bäibehalen. Bei de méi ale Kanner, bleift de Kierperkontakt méiglech an heiansdo och néideg (fir e Kand ze tréischten, fir him ze hëllefen, sech unzedoen, asw.). Den Erwuessene passt drop op, sech d’Hänn ze wäschen an eventuell och d’Gesiicht an dat vum Kand no esou engem physesche Kontakt.

D’Schutzmoossname fir d’Kanner

D’Hännwäsche bleift dee wichtegste Schutzgest. D’Personal sensibiliséiert d’Kanner jee no Alter a weist hinnen déi richteg Gesten.

D’Droe vun enger Mask, engem Bandana (Buff) oder engem Schal fir Kanner ënner zwee Joer ass streng verbueden (Erstéckungsgefor). Bei Kanner ënner 6 Joer, déi esou e Mond-Nues-Schutz schlecht verdroen, gëtt dovun ofgeroden. E kann den Infektiounsrisiko erhéijen, well e Kand reegelméisseg seng Mask a säi Gesiicht mat sengen Hänn beréiert. Extra Consignë (wéi eng Spezialmask unhunn) kënne fir besonnesch ufälleg Kanner gëllen, jee no Uweisung vun hirem Dokter.

Dës Moossname gëlle fir sämtlech Crèchen a Mini-Crèchen, privater wéi konventionéierter.

Wéi ginn d’Erzéiungs- an d’Betreiungskontrakter geréiert?

D’Erzéiungs- an d’Betreiungskontrakter (Contrats d’éducation et d’accueil) tëschent den Elteren an der Betreiungsstruktur, déi virum 25. Mee 2020 ofgeschloss goufen, gi vum 25. Mee 2020 bis de 15. Juli 2020 ausgesat.

Fir all Aschreiwung vum 25. Mee 2020 u gëtt en neie Kontrakt ofgeschloss, esou wuel fir déi Kanner, déi nei ageschriwwe ginn, wéi och fir déi Kanner, déi ewell virun der Suspensioun ageschriwwe waren. Dee Kontrakt leeft bis de 15. Juli 2020.

No dësem Datum gëllen nees d’Kontrakter vu virum 16. Mäerz 2020.

Wann et e Changement beim Horaire vun der Betreiung fir d’Zäit nom 16. Juli gëtt, da mussen d’Elteren an d’Betreiungsstruktur en Avenant zum Kontrakt ënnerschreiwen, fir sech op deen neien Horaire ze eenegen.

Wann d’Elteren hiert Kand aus der Betreiungsstruktur ausgeschriwwen hunn, da leeft den Delai vum Preavis och wärend der Zäit vun der Suspensioun vun de Kontrakter, vum 25. Mee bis de 15. Juli 2020. Deen Deel vum Preavis, deen an d’Zäit vun der Suspensioun fält, kann net a Rechnung gestallt ginn an dee Montant ass net vun den Eltere geschëlt.

Wéini musst Dir Äre Kontrakt mam Chèque-service accueil (CSA) erneieren?

Déi automatesch Verlängerung vum CSA-Kontrakt an der Zäit vun der Suspensioun a vun der progressiver Reprise vun den Aktivitéite leeft den 2. August 2020 aus. Doraus ergëtt sech, datt Dir de Renouvellement vum Kontrakt bis Enn August 2020 bei Ärer Gemeng ufroe musst.

Wéi ass d’Reprise an de Jugendhaiser organiséiert?

D’Jugendhaiser hunn Enn Mee erëm dermat ugefaangen ze informéieren, ze vermëttelen, ze beroden, ze hëllefen, ze ënnerstëtzen an ze guidéieren. Dëst geschitt an Eenzelgespréicher op Rendez-vous.

Déi Jonk kënnen och nees an d’Jugendhaiser goen, erlaabt si bis zu 20 Persounen, Personal abegraff, mat Maskeflicht (Mask, Bandana/Buff, Schal). Dat betrëfft Gruppen-, Fräizäit-, Animatiouns-, Formatiouns- an Accueilsaktivitéite grad ewéi Rencontrë bannent a baussent de Jugendhaiser.

Aktivitéite mat méi wéi 20 Leit an engem Jugendhaus dobannen oder dobausse sinn och méiglech, ënnert der Bedingung, datt déi Jonk attribuéiert Sëtzplazen hunn an och eng Mask, e Bandana (Buff) oder e Schal unhunn, wann eng tëschemënschlech Distanz vun zwee Meter net ka garantéiert ginn.

D’Personal kann och baussent de Jugendhaiser intervenéieren am Kader vun der mobiller Jugendaarbecht, besonnesch fir déi Jonk ze sensibiliséieren, wat déi aktuell Sécherheets- an Hygiènesmesurë ugeet, a fir se derbäi ze ënnerstëtzen, fir mat der sanitärer Kris eleng an zesummen eens ze ginn.

Grondschoul

Wéi ginn d’Coursen an den Accueil nom 29. Juni 2020 organiséiert?

Op Basis vun der Evolutioun vun der aktueller sanitärer Situatioun a vun de rezentste wëssenschaftlechen Erkenntnisser an no Récksprooch mat de verschiddenen Acteuren huet d’Regierung weider Deconfinements-Moossname fir d’Period vum 29. Juni bis de 15. Juli 2020 decidéiert.

Erëm ee gemeinsame Klassegrupp

Vun e Méindeg, den 29. Juni 2020 u sinn d´Gruppen A a B, déi am Wiesselrhythmus an der Schoul respektiv am betreite Léiere sinn, erëm zesummen an enger Klass. D’Schüler vun enger Klass kënnen deemno erëm zesummen an d’Schoul goen.

Déi schoulesch Organisatioun bleift onverännert

Den Horaire vun de Schüler, deen zanter dem 25. Mee a Kraaft ass, bleift onverännert: D’Coursë si vun 8 bis 13 Auer; den Accueil gëtt assuréiert vun 13 bis 18 Auer.

De Programm konzentréiert sech weiderhin op déi grondleeënd Inhalter, déi néideg si fir d’Weiderféiere vun de Programmer am nächste Schouljoer. D’Personal vum Educatiounsministère, dat sech virdrun ëm dat betreit Léiere gekëmmert huet, gëtt agesat, fir zesumme mam Titulaire déi Schüler, déi Hëllef brauchen, an hirem Léieren ze ënnerstëtzen.

No de Coursë kënnen dʼSchüler entweeder heemgoen oder si profitéiere vun enger Betreiung, déi dat erzéierescht Personal aus der Betreiungsstruktur iwwerhëlt. DʼSchüler hunn ausserdeem d’Méiglechkeet, fir gratis bekäschtegt ze ginn.

D’Kanner, déi wärend de Woche vum betreite Léiere vun doheem aus encadréiert ginn

DʼKanner vum Grupp B, déi zanter dem 25. Mee dat betreit Léiere vun doheem aus maachen, kënnen entweeder weiderhi vun den Eltere selwer encadréiert ginn oder d’Eltere froen un, datt hiert Kand erëm bei seng Klassekomerode an d’Schoul geet. Si mussen dem Titulaire vun der Klass bis de 25. Juni Bescheed soen.

Vulnerabel Schüler, Enseignanten an Elteren


Schüler, déi ufälleg sinn oder en ufällegen Elterendeel hunn (kuckt d’Definitioun ënner: „Wie kann e Congé aus familiäre Grënn (Congé pour raisons familiales) ufroen?“) kënne weiderhi vun doheem aus ënnerriicht ginn.

Membere vum Personal, déi als ufälleg ugesi ginn, kënne weiderhi vun doheem aus Coursen halen.

Kanner mat spezifesche Besoinen

Vum 29. Juni 2020 u fonctionéiert d’Betreiung vun de Schüler duerch spezialiséiert Enseignanten (I-EBS) an duerch aner spezialiséiert Intervenanten esou wäit ewéi méiglech nees wéi virum Ufank vum Confinement.

Grouss ugeluechten Tester

Déi zousätzlech Deconfinements-Moossname gi begleet vun enger Strategie vu grouss ugeluechten Tester. Sämtlech Schüler an Enseignantë ginn a Gruppe vu 5 Persounen agedeelt, déi da Woch fir Woch een nom anere getest ginn, fir eventuell Infektiounsketten esou fréi wéi méiglech ze identifizéieren.

Schutz vun der Gesondheet vu Schüler a Personal

Mannerjäreger ënner 13 Joer musse keng Mask unhunn, wa se dobausse sinn. D’Droe vun enger Mask oder engem anere Mond-Nues-Schutz ass awer recommandéiert, wann ee baussent dem Grupp vu senger Klass ass, a bleift fakultativ am Klassesall.

Déi aner Schutzmoossname bleiwen ubruecht, virun allem wat déi perséinlech Hygiènesmesuren ugeet (ë. a. d’Hännwäschen) an d’tëschemënschlech Distanz vun 2 Meter, déi baussent sengem Klassegrupp anzehalen ass.

Wéi ass et mat Schoulausflich?

DʼAusflich a pedagogesch Sortien am Dag si vum 22. Juni 2020 un nees erlaabt.

Ausflich mat Iwwernuechtung bleiwe bis de 15. Juli 2020 suspendéiert.

Ass fir eng Betreiung virun 8 Auer gesuergt?

Et gëtt eng Surveillance am Schoulhaff zéng Minutten, éier dʼCoursë respektiv dat betreit Léieren ufänken.

Et gëtt eng Surveillance organiséiert fir dʼKanner vun deenen Elteren, déi eng essentiell Aarbecht assuréieren an déi onbedéngt eng Betreiung fir hir Kanner vu 7 Auer u brauchen. Dës Surveillance ass awer enger ganz reduzéierter Zuel vun Eltere virbehalen.

Wéi eng Moossname ginn ëmgesat, fir d’Gesondheet vun de Schüler a vum Personal an de Cyclen 2 bis 4 ze schützen?

Zu den Distanz- an Hygiènesmesuren, déi vun all Schoul ëmgesat goufen, fir eng maximal Protektioun vun alle Kanner a vum Personal ze assuréieren, gehéiere virun allem:

- d'Droe vun enger Mask, engem Bandana (Buff) oder engem Schal iwwer Nues a Mond ass: 

   * fakultativ an de Klassesäll;
   * staark recommandéiert beim Zirkuléieren am Schoulgebai a fir Situatioune vun tëschemënschlechem Kontakt, wou d’Sécherheetsdistanz vun 2 Meter net ka garantéiert ginn;
   * obligatoresch am ëffentlechem an am Schoultransport.

Dat néidegt Material stellt de Ministère zur Verfügung.

- reegelméissegt Hännwäschen;

- datt an all Klassen- an an all Betreiungssall Desinfektiounsmëttelen zur Verfügung stinn, awer esou, datt d’Schüler net eleng drukommen;

- d’Ausschaffe vun engem Plang, wéi d’Schüler am Schoulberäich ze zirkuléieren hunn;

- d’Ausschaffe vun engem Plang fir Pausen an Erhuelungen, déi alternéieren. D’Kanner vun de Klassegruppen, déi am Haff sinn, kënnen all zesumme spillen a sech zesummen ameséieren, ouni Separatioun.

- DʼPersonal vum Cycle 1 an aus de Betreiungsstrukture kritt spezifesch Recommandatiounen, déi dem Alter vun de jonke Kanner ugepasst sinn, matgedeelt.

Wéi ass d’Reprise fir d’Schüler aus dem Cycle 1 organiséiert?

Bis dʼEnn vum Schouljoer ass et fakultativ, an dʼÉducation précoce ze goen.

Déi organisatoresch Modalitéiten, déi hei driwwer beschriwwe ginn (kuckt: Wéi ginn d’Coursen an den Accueil vum 29. Juni 2020 un organiséiert?), gëllen och fir dʼCyclen 1.1 an 1.2 (Éducation préscolaire). Wat dʼSchutzmoossnamen ugeet (kuckt hei drënner), esou kritt dʼPersonal vum Cycle 1 a vun de Betreiungsstrukture spezifesch Recommandatiounen, déi dem Alter vun de Kanner ugepasst sinn.

Wéi eng Moossname ginn ëmgesat, fir d’Gesondheet vun de Schüler a vum Personal vum Cycle 1 ze schützen?

Et gi spezifesch Recommandatioune fir jonk Kanner an d’Schutzmoossname ginn un d’Besoine vun de ganz klenge Kanner ugepasst.

Et gëtt ofgeroden, eng Mask, e Bandana (Buff) oder e Schal unzedoen

D’Kanner vum Cycle 1 hunn an der Schoul keng Mask un. An hire sanitäre Recommandatioune réit d’Santésdirektioun dovun of, Kanner ënner 6 Joer eng Mask unzedoen, fir Kanner ënner 2 Joer ass eng Mask esouguer streng verbueden (Erstéckungsgefor).

D’Enseignanten an d’Educateuren hunn am Klassesall och keng Mask un. Déi ganz jonk Kanner musse kënnen d’Gesiicht gesinn an de Gesiichtsausdrock vum Erwuessenen entdecken.

An der Klass passen d’Enseignanten an d’Erzéier drop op, datt d’Reegele vun der kierperlecher Distanz agehale ginn. Dat ass natierlech net zu all Ament méiglech. Et gëtt Situatiounen, an deenen den Erwuessenen e physesche Kontakt mam Kand muss hunn, fir et ze tréischten, fir him bei Alldagsgesten ze hëllefen asw.

Schutzgesten a Schutzmoossname bannen a baussen

D’Schutzgeste bei de ganz klenge Kanner besti besonnesch doran, sech d’Hänn gewëssenhaft ze wäschen, d’Betreiungsstruktur no baussen hin ofzesécheren an déi eenzel Kannergruppen net ze mëschen.

Fir eng maximal Sécherheet vun de Kanner a vum Personal ginn eng Rëtsch Moossnamen op verschiddenen Niveauen ëmgesat :

An der Entrée vum Gebai

Fir d’Zuel vun de Kontakter ze reduzéieren, däerfen d’Elteren, wann nëmme méiglech, net an d’Schoulgebai eran. Bausse si Plaze virgesinn, wou d’Kanner kënnen ofgeliwwert an ofgeholl ginn (Kiss & Go). D’Enseignanten an d’Educateuren empfänken d’Kanner op enger Plaz, déi extra dofir virgesinn ass. Fir dat ze vereinfachen, ginn esou wäit ewéi méiglech e puer Entréeën/Sortien dofir benotzt.

Am Klassesall

Wann d’Kanner bei hiren Dëscher sëtzen, ass eng Distanz vun zwee Meter tëscht hinnen anzehalen. Si hunn eng fix Plaz (Stull an Dësch), déi se zougewise kréien, déi kloer gekennzeechent ass an déi net gewiesselt gëtt. D’Still, d’Dëscher grad ewéi Objeten an Uewerflächen, déi am meeschten ugepaakt ginn, ginn all Dag gebotzt.

Material a Spillsaachen

D’Material an d’Spillsaache gi reegelméisseg gebotzt.
All Kand huet säin eegene Set vu Material (Bläistëfter, Faarwen, Pech, Schéier …) an dee soll, wann nëmme méiglech, net mat anere gedeelt ginn. Et gëtt och geroden, datt Kanner keng perséinlech Saache vun doheem mat an d’Schoul bréngen (ausser aus „emotionale“ Grënn).

Spiller dobaussen

Et gëtt geroden, datt déi jonk Schüler esou vill Zäit ewéi méiglech dobausse verbréngen, ouni datt sech dʼGruppe vun de Kanner vermëschen. Ausflich an de Bësch sinn och méiglech.

D‘Pause ginn zäitlech gestaffelt.

Wéi gëtt de Schülertransport organiséiert?

An all Gemeng, déi normalerweis e Schülertransport proposéiert, gëtt dësen un deen neie Stonneplang ugepasst (den Aller ass virum Ufank vun de Coursen ëm 8 Auer an de Retour ass nom Enn vun de Coursen ëm 13 Auer).

Wéi steet et ëm dʼBetreiung vu Schüler mat spezifesche Besoinen duerch dʼHëllefsekippen (ESEB)?

DʼSchüler mat spezifesche Besoinen, déi an de regulären Unterrecht integréiert sinn a vun der Hëllefsekipp ESEB (Équipe de soutien pour élèves à besoins spécifiques) betreit ginn, profitéiere vun dëser Betreiung onofhängeg dovun, ob se an dʼSchoul ginn oder an dʼBetreiungsstruktur (kuckt och an der FAQ dʼRubrik „Schüler mat spezifesche Besoinen“).

Wéi ass d’Reouverture vun den Internater organiséiert?

D’Internater maachen hir Dieren zäitgläich mat de Schoulen op.

Wéi leeft dʼOrientéierung an den Enseignement secondaire am Cycle 4 of?

Déi gemeinsam Tester (Épreuves communes) vum Cycle 4.2 am Kader vun der Orientéierungsprozedur an de Lycée falen ewech. DʼDecisioun fir eng Orientéierung baséiert sech op dat, wat de Schüler am Laf vum Cycle 4 geleescht huet, op dʼTëschebilane vum Cycle 4 an op dʼInformatioune vum Psycholog, wa sech dʼEltere fir seng Interventioun entscheet haten. DʼOrientéierungsgespréicher, an deenen den Titulaire vun der Klass an dʼEltere vun de Schüler eng gemeinsam Decisioun fir eng Orientéierung huelen, gi bäibehalen. DʼAschreiwungen an de Lycée sinn tëscht dem 29. Juni an dem 3. Juli 2020.

Sämtlech Porte-ouverten an de Lycéeën an an den internationale Lycéeë sinn annuléiert. Verschidden Etablissementer proposéieren awer virtuell Porte-ouverten. Méi detailléiert Informatioune gëtt et op den Internetsitte vun de Lycéeën.

Wéi gesäit et mat den Tëschebilanen an de Bilanen um Enn vum Cycle aus?

Dat zweet an dat drëtt Trimester vum Schouljoer ginn zesummegeluecht zu enger eenzeger Referenzperiod, déi vum 6. Januar 2020 bis de 15. Juli 2020 geet.

D’Bilansgespréicher vum 2. Trimester falen aus.

Fir all Schüler gëtt en Tëschebilan fir d’Zäit vum 6. Januar bis de 15. Juli 2020 opgestallt. Fir Schüler, déi an den nächste Cycle wiesselen, gëtt um Enn vum Schouljoer e Bilan fir de ganze Cycle opgestallt (Bilan de fin de cycle).

Enseignement secondaire

Wéi ginn d’Coursë vum 29. Juni 2020 un organiséiert?

Op Basis vun der Evolutioun vun der aktueller sanitärer Situatioun a vun de rezentste wëssenschaftlechen Erkenntnisser an no Récksprooch mat de verschiddenen Acteuren huet d’Regierung weider Deconfinements-Moossnamen decidéiert.

D’A- a B-Gruppe ginn ofgeschaaft.

Vum 29. Juni 2020 u gëtt et kee Wiesselsystem méi am Lycée, wou den Unterrecht dann erëm mat enger normaler Zuel vu Schüler pro Klass funktionéiert. All d’Schüler ginn deemno erëm an d’Schoul an d’Klasse funktionéiere mat enger normaler Zuel vu Schüler.

D’Horairen, déi den 11. Mee ageféiert goufen, änneren net: D’Coursë fänken um 8 Auer un an dauere bis 13 Auer. D’Organisatioun an der Schoul ännert net.

D’Schutzgestë ginn all bäibehalen.

Déi sanitär Mesuren, déi zanter dem 11. Mee gëllen, gi bäibehalen: Am Klassesall ass d’Droe vun enger Mask oder vun engem anere Schutz, fir sech d’Nues oder de Mond ze bedecken, fakultativ; baussent dem Klassesall ass dëst awer recommandéiert. An de Schoule ginn d’Hygiènesmoossnamen an d’Mesuren, duerch déi d’Zirkuléiere vun de Leit gereegelt ass, bäibehalen.

Vulnerabel Enseignanten a Schüler

Déi vulnerabel Schüler an déi, déi eng vulnerabel Persoun an der Famill hunn (kuckt d’Definitioun ënner: „Wie kann e Congé aus familiäre Grënn (Congé pour raisons familiales) ufroen?“) kënne weiderhin am Homeschooling bleiwen. D’Personal, dat als vulnerabel gëllt, kann och weiderhin op Distanz vun doheem aus enseignéieren.

Ausflich a pedagogesch Sortien

D’Ausflich sinn erlaabt, wa se net méi ewéi een Dag daueren an déi sanitär Moossnamen, déi op der Plaz gëllen, wou den Ausfluch higeet, agehale ginn. Et gëtt dervun ofgeroden, an d’Ausland ze goen.

Wéi eng Moossname ginn ëmgesat, fir d’Gesondheet vun de Schüler a vum Personal vum Enseignement secondaire ze schützen?

Vun de Reprise u ginn an all Gebai Distanz- an Hygiènesmesuren ëmgesat, fir eng maximal Protektioun vun alle Kanner a Jugendlechen a vum Personal ze assuréieren. Dozou gehéieren:

- de Respekt vun enger tëschemënschlecher Distanz vun 2 Meter (duerch d’Organisatioun vun de Beweegungsfluxen an de Couloiren, versate Pausen asw.);

- d'Droe vun enger Mask, engem Bandana (Buff) oder engem Schal iwwer Nues a Mond ass: 

   * fakultativ an de Klassesäll;
   * staark recommandéiert beim Zirkuléieren am Schoulgebai a fir Situatioune vun tëschemënschlechem Kontakt, wou d’Sécherheetsdistanz vun 2 Meter net ka garantéiert ginn;
   * obligatoresch am ëffentlechem an am Schoultransport.

Dat néidegt Material stellt de Ministère zur Verfügung.

- d’Zesummesetzung vun de Klasse soll, esou wäit dat méiglech ass, stabel bleiwen, fir doduerch esou gutt wéi méiglech ze evitéieren, datt Schüler mat anere Schüler a Kontakt kommen, déi net zum selwechte Grupp gehéieren;

- reegelméissegt Hännwäschen;

- datt an all Klassesall an an all Schoulentrée Desinfektiounsmëttel zur Verfügung stinn;

- d’Ausschaffe vun engem Plang, wéi d’Schüler am Schoulberäich ze zirkuléieren hunn;

- d’Ausschaffe vun engem Plang fir Pausen an Erhuelungen, déi alternéieren;

- d’Zoubleiwe vun de Kantinnen. Léisungen, fir d’Schüler ze verfleegen, zum Beispill mat Snacken, gi virgesinn.

Wéi gëtt op de Klasse vu 7e bis 2e bewäert an op wéini sinn dʼPrüfunge verluecht?

An der Zäit vun der Suspensioun ginn dʼEnseignanten an de Sproochen an an der Mathematik grad ewéi, fir déi iewescht Klassen, an de Spezialdisziplinne vun den eenzele Sektiounen all eenzele Schüler e konstruktive Feedback iwwer déi erziilte Fortschrëtter an iwwer dat, wourun nach muss geschafft ginn.

No der Reprise vun de Coursë ginn a sämtleche Fächer Prüfungen organiséiert.

Fir dʼSemestermoyenne an den eenzele Fächer ze rechnen, gëtt déi niddregst Nott net berücksichtegt.

Fir dʼMatmaache beim Unterrecht op Distanz (Enseignement à distance) vun de Schüler an der Zäit vun der Suspensioun vun de Coursen ze belounen, kënnen dʼEnseignanten an all dëse Fächer dʼMoyenne vun den Notten ëm 1 bis 4 Punkten eropsetzen.

An deenen anere Fächer
kucken dʼSchüler no der Reprise vun de Coursen zesumme mat hiren Enseignanten iwwer dat, wat an der Zäit vun der Suspensioun realiséiert gouf, a kréien dʼMéiglechkeet, nach eemol drun ze schaffen. Eréischt duerno ginn dës Aarbechte mat enger Nott bewäert.

Fir dʼSemestermoyenne an den eenzele Fächer ze rechnen, gëtt déi niddregst Nott net berücksichtegt.

Fir dʼMatmaache beim Unterrecht op Distanz (Enseignement à distance) vun de Schüler an der Zäit vun der Suspensioun vun de Coursen ze belounen, kënnen dʼEnseignanten an all dëse Fächer dʼMoyenne vun den Notten aus der Zäit vum 6. Januar bis den 9. Juli 2020 ëm 1 bis 4 Punkten eropsetzen.

DʼPromotiounskrittären um Enn vum Schouljoer bleiwen onverännert.

Wéi ass d’Reouverture vun den Internater organiséiert?

D’Internater maachen hir Dieren zäitgläich mat de Lycéeën op.

Wéi funktionéieren de Service psycho-social et d’accompagnement scolaires (SePAS), de Service socio-éducatif (SSE) an d’Équipe pour enfants à besoins spécifiques (ESEB) an de Lycéeën?

DʼServicer SePAS, SSE an ESEB an all Lycée si fir Elteren, Schüler an Enseignanten disponibel iwwer eng Telefonspermanence, déi wärend de Bürosstonne funktionéiert. DʼPsychologen, dʼAssistant-sociallen an dʼEducateuren hunn en oppent Ouer fir jiddereen, deen Hëllef brauch, a proposéieren eng psycho-sozial Begleedung. Déi eenzel Servicer sinn iwwer Telefon ze erreechen, hir Nummere fënnt een op den Internetsitte vun de jeeweilege Lycéeën

Wat maachen, wann een doheem net dat néideg informatescht Material huet?

DʼEltere vun deene Schüler, déi doheem net dat néideg informatescht Material oder keng Internetverbindung hunn, si gebieden, dʼSekretariat vum Lycée ze kontaktéieren.

Beruffsausbildung

Wéi ginn d’Coursë vum 29. Juni 2020 un organiséiert?

Op Basis vun der Evolutioun vun der sanitärer Situatioun an de rezentste wëssenschaftlechen Erkenntnesser an no Récksprooch mat de verschiddenen Acteuren huet d’Regierung weider Deconfinements-Moossnamen decidéiert. Den 29. Juni ass Schluss mam Wiesselsystem, da leeft den Unterrecht nees mat normale Schülerzuelen (kuckt ënner „Enseignement secondaire“).

Wéini kënnen dʼLéierjongen/Léiermeedercher zréck an dʼEntreprise, déi se ausbilt?

An deene Secteuren, fir déi en Deconfinement decidéiert gouf, ass et de Léierjongen/Léiermeedercher erlaabt, vum Zäitpunkt vun der Reprise vun de Coursen nees op hir Léierplaz ze goen (4. Mee fir dʼOfschlossklassen an 11. Mee fir all déi aner Klassen) – ënnert der Bedingung, datt hir sanitär Sécherheet garantéiert ass an datt hir praktesch Ausbildung vun der Entreprise, déi ausbilt, esou assuréiert ka ginn, wéi et sech gehéiert.

Kann e Léierjong/Léiermeedche fir d’Deelzäit-Aarbechtslosegkeet a Fro kommen?

Jo, och Léierjongen/Léiermeedercher kënne vun der Reegelung fir d’Deelzäit-Aarbechtslosegkeet profitéieren. Weider Infoen.

Gëtt d’Schouljoer 2019-2020 bewäert?

D’Zil ass, de Schüler an och de Léierjongen/Léiermeedercher eng Promotioun am Laf vum Schouljoer 2019/2020 ze erméiglechen.

Wéi ginn dʼModülle bewäert?

DʼBewäertungsmethode ginn de Uspréch vun der aktueller Situatioun no ugepasst. No der Reprise vun de Coursë gëtt all Modüll bewäert, esouwäit dat méiglech ass.

Um Enn vum Joer ginn – ënner verschiddene Formen – Méiglechkeeten ugebueden, fir dʼJoer ze packen (Possibilités de repêchage sous différentes formes).

Wéi ginn d’Patronatsmodüller bewäert?

D’Léierjongen an d’Léiermeedercher kréien eng Dispense fir d’Patronatsmodüller vum 2. Semester. Déi Modüller sinn also gepackt.

Sinn dʼStagen? Wéi gi se bewäert?

Fir dʼSchüler op den Ofschlossklasse gëtt et eng Dispense fir all déi Stage-Modüller, déi onméiglech kënne bewäert ginn. Op allen anere Klasse kréien dʼSchüler eng Dispense fir all déi Stage-Modüller, déi tëscht dem 16. Mäerz an dem Enn vum Schouljoer sollte sinn.

Gëtt d’Dauer vun den integréierte Projeten adaptéiert?

D’Dauer vun de finalen a vun den intermediairen integréierte Projete gëtt ugepasst an hiren Inhalt beschränkt sech op déi Matière, déi bis zum Schluss vum 1. Semester vum Schouljoer 2019/2020 behandelt gouf.

D’Commissairen, déi sech ëm déi final integréiert Projeten, déi a Form vu Modüllen am Laf vum Joer organiséiert goufen, këmmeren, deelen d’Modalitéiten esou séier ewéi méiglech de concernéierte Lycéeë mat.

Gëtt d’Frist, fir de Léierkontrakt ze ënnerschreiwen, verréckelt?

De leschten Datum, fir de Léierkontrakt ze ënnerschreiwen, war ursprénglech den 31. Oktober. Deen Datum gëtt verréckelt.

Ginn dʼCoursen an dʼExamen, fir de Meeschterbréif (Brevet de maîtrise) ze kréien, verréckelt?

DʼVirbereedungscoursen an dʼExamen an der Meeschterausbildung gi verluecht.

De „Service de la formation professionnelle“ vum Ministère fir Educatioun, Kanner a Jugend an dʼHandwierkskummer (Chambre des Métiers) hunn déi follgend Richtlinne fir den Ofschloss vum Schouljoer 2019/2020 a fir dʼOrganisatioun vun den Examenssessiounen am Fréijoer an am Hierscht 2020 decidéiert:

1. Am Kader vun de Méiglechkeete sinn dʼExame vun der Fréijoersessioun 2020 fir dʼCoursë vun der allgemenger Theorie (Gestioun vun enger Entreprise/Théorie générale) a vun der Fachtheorie (Théorie professionnelle) am Juli 2020.
2. DʼExame bezéie sech am Prinzip op déi Léierinhalter, déi bis zum Zäitpunkt vun der Suspensioun vum Unterrecht, dat heescht bis den 13. Mäerz 2020, ënnerriicht goufen.
3. DʼExame ginn ënner deene Gesondheetsvirschrëften, déi fir dʼOfschlossprüfung am Secondaire festgeluecht goufen, organiséiert (kuckt an der FAQ ënner „Enseignement secondaire“).
4. DʼKandidatinnen a Kandidaten, déi den Dag vun der Suspensioun dʼBedingunge fir dʼExamen erfëllt hunn, ginn op déi Examen, fir déi si sech ugemellt hunn, geruff.
5. DʼDemandë fir individuelle Formatiounscongé (Congé individuel de formation), déi de Ministère ewell accordéiert hat, bleiwe gülteg. Et ass also net néideg, eng nei Demande ze maachen.
6. Déi praktesch Exame ginn an der Allerhellege-Vakanz, vum 2. bis de 7. November 2020, organiséiert.
7. DʼExamenskommissioune si gehalen, dʼDauer vun der praktescher Prüfung ze kierzen, esouwäit dat méiglech ass.
8. DʼExame vun der Hierschtsessioun 2020 an der allgemenger Theorie (Gestioun vun enger Entreprise/Théorie générale) a vun der Fachtheorie (Théorie professionnelle) ginn tëscht dem 5. an dem 16. Oktober 2020 organiséiert.
Sollt et fir e bestëmmte Cours oder e bestëmmtent Fach net méiglech sinn, déi ënner de Punkten 1 an 2 festgeluechte Richtlinnen anzehalen, schafft de „Service de la formation professionnelle“ vum Ministère fir Educatioun, Kanner a Jugend zesumme mat der Handwierkskummer an der Examenskommissioun eng Alternativléisung aus.
DʼHandwierkskummer setzt en detailléierte Plang op, deen si allen Interesséierten (Kandidaten, Enseignanten a Membere vun der Examenskommissioun) esou séier wéi méiglech matdeelt.

Bei Froen iwwer dʼOrganisatioun adresséiert Iech wgl. un dʼHandwierkskummer ënner brevet@cdm.lu.

Wéi ass et mat der Patronatsformatioun am CNFPC?

DʼAktivitéite ronderëm dʼPatronatsformatioun gi fir dʼZäit vun der Suspensioun och gestoppt.

Wéi gesäit et mat professionelle Reuniounen aus?

Bei der Annonce vun den Decisiounen aus dem Regierungsrot vum 15. Mäerz 2020 huet de Premierminister betount, datt dʼRegierung dʼZuel vun den Deplacementer vu Persoune reduzéiere wéilt. Dofir si sämtlech „professionell“ Reuniounen (wéi preliminärer, curriculärer an anerer) ofgesot, bis eng nei Direktiv kënnt.

Museksunterrecht

Wéi gëtt d’Reprise am Museksunterrecht organiséiert?

Déi individuell Coursë vum Museksunterrecht kënne fir sämtlech Fächer a sämtlech Niveauen nees am Juni ufänken.

Och déi gemeinsam Virbereedungscoursen op d’Exame fir den Éischte Präis (Premier prix) oder fir den Ieweschten Diplom (Diplôme supérieur) kënne fir sämtlech Fächer nees ufänken. Hei ass et d’Recommandatioun, d’Zuel vun de Schüler pro Cours op zéng ze begrenzen.

Weider gëtt de Museksschoule geroden, all déi aner gemeinsam Coursen nach auszesetzen, fir sämtlech Fächer a sämtlech Niveauen (am Eveil, an den ënneschten, mëttleren, mëttlere spezialiséierten Divisiounen; am ënneschten a mëttleren Degré asw.).

D’Reprise vun de Coursen an den Oflaf vun den Exame gi vun de Schutzmesurë begleet, déi vun der Regierung matgedeelt goufen.
Fir et alle Schüler ze erlaben, d’Schouljoer an de beschtméigleche Bedingungen ofzeschléissen, ginn d’Programmer an den Oflaf vun den Tester an Examen an alle Branchë vum Museksunterrecht ugepasst.

Erwuessenebildung

Wéi ass d’Reprise vun de Grondbildungscoursen (Cours d’instruction de base) organiséiert?

DʼCoursen an dʼAteliere vun der Grondbildung vum Service vun der Erwuessenebildung (Service de la formation des adultes) fänken de Méindeg, 1. Mee 2020 nees mam Presenzunterrecht un – mat méi klenge Gruppe vu Schüler an am Respekt vun de Schutzmoossname géint dʼVerbreedung vum Coronavirus Covid-19 an och mat liicht ënnerschiddleche Stonnepläng op den eenzele Sitten (Wolz, Ettelbréck, Kierchbierg, Iechternach an Déifferdeng). DʼApprenantë ginn am Laf vun der Woch vum 4. Mee vun hiren Enseignantë per Telefon informéiert.

DʼPrestatairen (Gemengen an Associatiounen), déi eng Konventioun mam Ministère hunn, hunn dʼErlabnes, nees den 11. Mee 2020 mat de Presenzcoursen unzefänken – mat méi klenge Gruppe vu Schüler an am Respekt vun de Schutzmoossname géint dʼVerbreedung vum Coronavirus Covid-19. DʼApprenantë gi vun de Prestatairë per Telefon informéiert, éier de Cours ufänkt.

Wéi ass dʼReprise vun de Coursen am zweete Bildungswee organiséiert?

DʼCoursë vum zweete Bildungswee (deuxième voie de qualification), déi daagsiwwer als Presenzunterrecht um Site vum „Service de la formation des adultes“ um Kierchbierg gehale ginn, fänken den 11. Mee 2020 nees un an zwar mam Wiesselsystem am Wocherhythmus (dʼKlass gëtt an zwee Gruppe gedeelt, déi sech ofwiesselen an déi eng Woch Coursen an der Schoul hunn an déi aner Woch doheem widderhuelen).

DʼCoursë vum zweete Bildungswee, déi owes an de Lycéeë sinn (ECG, LGK, LNW, LTC, LTMA), fänken och den 11. Mee 2020 nees mam Presenzunterrecht un, och mam Wiesselsystem am Wocherhythmus, oder se gi weider aus der Distanz gehale mat der Méiglechkeet, op en Tutorat mat Presenz zeréckzegräifen. DʼBewäertunge ginn ausschliisslech a Presenz gemaach.

Wéi ginn déi allgemeng Coursen organiséiert?

Déi allgemeng Coursen (Cours d'intérêt général) mat Presenz fale bis un dʼEnn vum Schouljoer 2019-2020 aus. Eng Partie Coursë gëtt, esouwäit dat méiglech ass, aus der Distanz gehalen. DʼApprenantë gi virum Ufank vun de Coursë vun de Prestatairë per E-Mail informéiert.

Wéi kritt een de Certificat „Vivre ensemble au Grand-Duché de Luxembourg“?

DʼCoursë „Vivre ensemble au Grand-Duché de Luxembourg“ fale bis un dʼEnn vum Schouljoer 2019-2020 aus. Examen, fir de Certificat ze kréien, deen een am Kader vun der Prozedur fir dʼLëtzebuerger Nationalitéit ze kréie brauch, ginn awer weider reegelméisseg um Site Kierchbierg organiséiert.

DʼAschreiwung leeft iwwer de Site lux.men.lu, wou Dir och dʼModalitéite vum Exame fannt grad ewéi Linken op Referenzdokumenter, fir den Exame virzebereeden.

Wéi kritt een Informatiounen a Rotschléi iwwer dʼErwuessenebildung?

Dir kënnt Kontakt ophuele mam „Service de la formation des adultes“ entweeder iwwer Telefon um 8002-4488 oder per E-Mail op sfa@men.lu.

Wann et néideg ass, kann och e Rendez-vous mat engem Conseiller an der Erwuessenebildung um Site Kierchbierg ausgemaach ginn

Vu Visitten ouni Rendez-vous gëtt ofgeroden..

Wéini sinn dʼEpreuven am Institut national des langues (INL)?

Déi reegelméisseg Kontrolle grad ewéi déi national an international Tester an Exame ginn op e spéideren Datum verluecht. Informatiounen doriwwer gi matzäit matgedeelt iwwer den Internetsite www.inll.lu.

Organiséiert den Institut national des langues (INL) Online-Coursen?

DʼApprenantë kënnen hir elektronesch Léierplattform consultéieren. Si si gehalen, dʼInstruktioune vun den Enseignanten ze respektéieren an déi Aufgaben, déi hinne proposéiert ginn, selbstänneg ze maachen.

  • Mis à jour le 03-07-2020